Mwy am Llên Natur
Cynhelir Prosiect Llên Natur dan adain Cymdeithas Edward Llwyd.
Ymgais ydi'r prosiect i efelychu gwerthoedd Edward Llwyd, polimath mawr Oes yr Ymoleuo, drwy geisio priodi, fel y gwnaeth yntau, astudiaethau o natur, hanes a iaith, ond i wneud hyn mewn ffordd gyfoes a chyffrous.
Daeth Prosiect Llên Natur i fodolaeth yn 2007 ar ôl llwyddiant ei ragflaenydd, sef prosiect Llên y Llysiau.
Ymgorfforwyd yng ngwefan Llên Natur yr holl wybodaeth a gasglwyd ar gyfer Llên y Llysiau, gan ymestyn y prosiect newydd i gwmpasu'r amgylchedd yn ei gyfanrwydd.
Mae'r prosiect yn perthyn i bawb a gallwch gyfrannu i'r cronfeydd a chodi gwybodaeth ohonynt.
Dehonglir y gair "llên" yn llac iawn fel y gallwn gynnwys unrhyw sylw priodol ar y byd o'n cwmpas, ddoe a heddiw, boed yn lenyddol, ysgrifenedig, gwyddonol, darluniadol, llafar mewn unrhyw iaith mor agos a phosibl at y ffynhonell wreiddiol.
Prosiect a gwefan Cymraeg ei hiaith yw Llên Natur ond mae lle hefyd i gyfraniadau mewn ieithoedd eraill.
Hyderwn y bydd Prosiect Llên Natur yn gweddu i weledigaeth gwmpasog a chynhwysfawr y Cymro o'i amgylchedd ac o fudd i ddysgwyr yr iaith yn ogystal.
